احنا اللى عملنا فى نفسنا كده

من طرف **Admin** الإثنين أغسطس 02, 2010 1:36 pm

وانا اتصفح اراء القراء على موضوع الزوجة الصينية فى موقع مصراوى عجبنى هذا التعليق الشعرى جدا
علشان احنا اللى
حنا اللى بيضنا الأرنب بالفهلوة وحلبنا التور
احنا اللى كعبلنا النملة وجبنا لبن العصفور
احنا اللى يحكمنا مبارك ونظيف وشريف وسرور
احنا اللى عشان رغيف ناكله واقفين فى طابور
احنا اللى نص مرتبنا رايح فى فاتورة مية ونور
احنا اللى نرصف فى الشارع والصبح نلقاه محفور
احنا اللى كل ساعة حادثة نطلع منها بضحايا وكسور
احنا اللى أ كلنا الفول ابو سوس فى طبق مكسور
احنا اللى هارينا ضرايب هذا الخايب غالى المسعور
احنا اللى فينا يقول لأه يصبح جانى وكلنا جايين بالدور
احنا اللى الكبير ياخد رشوة وعاوزين الطابق مستور
احنا اللى عاوزينا نهاجر م الدنيا نبعد ونغور
احنا اللى اعضاء مجاليسنا جايين بالزور
احنا اللى فينا يقول حقى فى القسم يتشد على خابور
احنا اللى نطرد الفلاح من أرضه ونحول المزروع الى بور
احنا اللى ابن الباشا يغش وان قلنا لأ ننضرب بساطور
احنا اللى بننصب فى الفاعل والمنصوب نعمله مجرور
ااحنا اللى نضلم شوارعنا بليل ونورها فى عز النور
احنا اللى يغلط فينا يقول: انا يا با عبد المأمور
احنا اللى فى كل حياتنا متعلقين فى سواقى بتدور
احنا اللى نقدم ونأخر فى الساغة على كيف طرطور
احنا اللى دهنا الهوا دوكو وخرمنا القرش بلا شنيور
احنا اللى طلعنا من المية وجننا عروس البحور
احنا اللى رجعناها حلوة جميلة العجوز ام منخور
احنا اللى ريسنا بيجرى واحنا وراه نلهث فى طابور
احنا اللى ريسنا حبيبنا راجل جدع مش عايش الدور
احنا اللى كل مايتكلم يقولنا :كتر عددكم وانا معذور
احنا اللى 30 سنة فى طوارئ وعشان جمالنا جه الدستور
احنا اللى كاتمين على صوتنا داخل بلدنا وبرة السور
احنا اللى لازم نتحرك ونطالب برجوع الحق المهدور